مریم نواز شریف کا دعویٰ ہے کہ عوامی حکومتوں کو چلنے نہيں ديا جاتا، اس لئے پاکستان اسٹرگل کررہا ہے، پچھلی حکومت نااہلی کی وجہ سے ملک کی بری حالت کرکے گئی، ن لیگ کی بدقسمتی ہے کہ اسے ہمیشہ تباہ شدہ پاکستان ملتا ہے، ہمارے اقتدار سنبھالنے کا مقصد پاکستان کو بچانا ہے۔
لاہور میں مسلم لیگ ن کی سوشل میڈیا ٹیم سے خطاب کرتے ہوئے ن لیگ کی نائب صدر مریم نواز شریف کا کہنا تھا کہ 75 سال ہوگئے یہ سنتے ہوئے کہ ملک نازل صورتحال سے گزر رہا ہے، عوامی حکومتوں کو چلنے نہيں ديا جاتا، اس لئے پاکستان اسٹرگل کررہا ہے۔
انہوں نے کہا کہ ہميں کہا گيا آپ نے مشکل وقت ميں حکومت کيوں لی؟، پاکستان کے دوسرے ممالک سے تعلقات خطرے ميں تھے، نواز شريف نے معيشت کی گروتھ 6 فيصد تک پہنچائی، پچھلی حکومت نااہلی کی وجہ سے ملک کی بری حالت کرکے گئی، ان حالات ميں حکومت کا رہنا خطرے سے خالی نہيں تھا۔
مریم نواز کا کہنا ہے کہ اس وقت پاکستان کی معیشت وینٹی لیٹر پر ہے، دھرنا، جلاؤ گھيراؤ، اسلام آباد پر حملہ يہ کيسے پاکستانی ہیں؟، اس طرح آپ کی پاکستانيت پر سوال کھڑے ہوں گے، ایک بچہ انقلاب کیلئے نکلا تھا جو آج تک اپنے گھر نہیں پہنچا، جو انقلاب کیلئے نکلا تھا وہ آج اپنی ضمانتيں کروارہا ہے، سپر پاور کو للکارنے والا گرفتاری کے ڈر چھپ کر بیٹھا ہے، کیا کسی حکومت نے کرسی کیلئے اسلام آباد کو آگ لگائی؟۔
مریم نواز نادانستگی میں اپنی اتحادی جماعت پیپلزپارٹی پر تنقید کرگئیں کہا کہ ن لیگ کی بدقسمتی ہے کہ اسے ہمیشہ تباہ شدہ پاکستان ملتا ہے۔ واضح رہے کہ اس سے قبل تینوں بار مسلم لیگ ن کو پیپلزپارٹی کے بعد ہی حکومت ملی تھی۔
ان کا کہنا ہے کہ ن لیگ کو سیاست کی نہیں ریاست کی فکر ہے، ہمارے اقتدار سنبھالنے کا مقصد پاکستان کو بچانا ہے۔ انہوں نے یہ بھی دعویٰ کردیا کہ پاکستان کو بنانے اور پاؤں پر کھڑا کرنے کا کریڈٹ ن لیگ کو جاتا ہے، اب پاکستان میں بات چیت فتنہ، فساد اور انتشار سے ہٹ کر عوام کے مسائل پر آنی چاہئے۔
عمران خان حکومت پر کڑی تنقید کرتے ہوئے ان کا کہنا تھا کہ بنی گالہ کرپشن کا ہيڈ کوارٹر بنا ہوا تھا، ايک ايک نوکری تبديلی کيلئے بنی گالہ نے کتنا پيسہ ليا پتہ چلے گا، ہم نے پرفارمنس پوچھی تو پرچی پڑھ کر بھی جواب دينا نہیں آرہا تھا، ہم اپنی 6 ہفتے کی حکومت کا بھی جواب دینے کو تیار ہیں، عمران خان نے سی پيک پروجيکٹ بند کردیئے تھے، واپس بحال کررہے ہيں۔
نائب صدر مسلم لیگ ن نے مزید کہا کہ کہہ رہے ہيں کہ عمران خان بیرونی دوروں پر نہيں گيا، عمران خان کو کسی نے بلايا ہی نہيں تو وہ جائے گا کيسے، روز جلاؤ گھيراؤ، کھيل تماشہ ہوگا تو کون اس ملک میں آئے گا؟۔
