سابق وفاقی وزیر اور عوامی مسلم لیگ کے سربراہ شیخ رشید کا کہنا ہے کہ حکمران آئی ایم یاف کے معاہدے کے لیے امریکا کے پاؤں پڑ رہے ہیں، ووٹ کو عزت دو کا نعرہ اب نواز شریف کی واپسی کا منتظر ہے۔
سماجی رابطے کی ویب سائٹ ٹویٹر پر اپنی ٹویٹ میں سابق وزیر داخلہ شیخ رشید کا کہنا تھا کہ پنجاب کے ایک صوبے میں 2 اسمبلیوں کے اجلاس ہورہے ہیں، 20 منحرف اراکین کا الیکشن 1 ووٹ کی اکثریتی حکومت کا فیصلہ کرے گی، حالات خراب ہورہے ہیں، سپریم کورٹ کو سوموٹو لینا چاہیے۔
شیخ رشید کا کہنا تھا کہ امپورٹڈ حکومت مفاد پرستوں کا دوسرا نام ہے، امپورٹڈ حکومت کو غریبوں کی نہیں اپنے کیسز کے ختم کرانے کی فکر ہے، خدا خیر کرے اب آصف زرداری نے پیپلزپارٹی کی کمان سنبھال لی ہے۔
سابق وفاقی وزیر نے کہا کہ عنقریب بجلی قیمت میں اضافہ کا تیسرا کرنٹ لگے گا، فارن ترسیلات،فارن ریزرو اور روپے کی گراوٹ کی کمی کی انہیں کوئی فکر نہیں۔
شیخ رشید کا کہنا تھا کہ ایک مہینے میں درآمدگی بل سو فیصد بڑھ گیا ہے، 7بلین ڈالرز کے ریزرو، ایک بلین کی ترسیلات اور 500 ملین ایکسپورٹ کم ہوگئی، ایل این جی مہنگی اور ڈالر 210 روپے کا ہو گیا ہے، اور یہ آئی ایم ایف کے معاہدے کیلئے امریکا کے پاؤں پڑ رہے ہیں، ووٹ کو عزت دو کا نعرہ اب نواز شریف کی واپسی کا منتظر ہے۔
