سپریم کورٹ میں چرس اسمگلنگ کے ملزم کی درخواست ضمانت پر سماعت کے دوران جسٹس فائز عیسیٰ نے اے این ایف حکام کو جھاڑ پلا دی۔

جسٹس فائز عیسٰی نے ریمارکس دیئے کہ دوسرے مقاصد کے لئے اے این ایف نے اپنی ساکھ خراب کرلی ۔ کل کو یہ کسی جج کی گاڑی سے بھی چرس نکال سکتے ہیں۔

پراسیکیوٹر اے این ایف نے بتایا کہ ملزم موٹرسائیکل پر چرس اسمگل کرنے کی کوشش کر رہا تھا۔ اے این ایف نے بغیر نمبر پلیٹ والی موٹرسائیکل روک کر تلاشی لی تو سیٹ کے نیچے سے تين کلو چرس برآمد ہوئی۔

جسٹس فائز عیسٰی نے ریمارکس دیئے کہ بغیر نمبر پلیٹ گاڑیوں کو روکنا پولیس کا کام ہے اے این ایف کا نہیں۔ کیا اے این ایف کے پاس بائیک سے متعلق کوئی معلومات تھیں؟ شہر میں ہزاروں گاڑیاں بغیر نمبر پلیٹ گھوم رہی ہوتی ہيں۔ کیا اے این ایف سب کی تلاشی لے گی۔

جسٹس فائز عیسٰی کا کہنا تھا کہ اے این ایف نے دوسرے مقاصد کے لیے اپنی ساکھ خراب کر لی اور خود کو مشکوک بنا لیا۔ سب کو پتہ ہے منشیات کہاں بکتی ہے۔ وہاں اے این ایف کوئی کارروائی نہیں کرتا۔

جسٹس منصور علی شاہ بولے قانون واضح ہے معلومات ہوں گی تو ہی کارروائی ہوگی۔ پوچھا پولیس کو اطلاع دیئے بغیر کیا اے این ایف گاڑیوں کی تلاشی لے سکتا ہے۔

جسٹس قاضی فائز عیسٰی نے کہا اے این ایف والوں کو قانون سپریم کورٹ نے تو نہیں پڑھانا۔ اے این ایف کم ازکم اپنا قانون تو پڑھ لے۔ پڑوسی سے جھگڑا ہو تو اس پر بھی منشیات ڈال دیں۔

عدالت نے ملزم کی ضمانت منظور کر لی۔ عدنان خان کے خلاف تھانہ اٹک میں اے این ایف نے مقدمہ درج کرایا تھا۔