پاکستان ویمن ٹیم کی سابق کپتان ثنا میر اور عروج ممتاز اور سابق بین الاقوامی کھلاڑی مرینہ اقبال نے راولپنڈی میں اگلے ہفتے خواتین کے نمائشی میچوں کی میزبانی پر خوشی کا اظہار کیا۔

پاکستان کرکٹ بورڈ (پی سی بی) کی جانب سے 8، 10 اور 11 مارچ کو راولپنڈی کرکٹ اسٹیڈیم میں پاکستان سپر لیگ 8 کے دوران پہلی بار خواتین کے درمیان نمائشی میچز کا انعقاد کیا گیا ہے جس میں دنیا کے 7 ممالک سے 10 کھلاڑی حصہ لیں گی۔

اس سے حوالے سے 78 میچوں میں پاکستان کی نمائندگی کرنے والی مرینہ اقبال نے کہا کہ نمائشی میچز خواتین کی کرکٹ کی ترقی میں ایک بہت بڑا اقدام ہے۔ یہ میچ ابھرتے ہوئے کھلاڑیوں کو بین الاقوامی ستاروں سے سیکھنے کا موقع فراہم کریں گے۔

مرینہ اقبال نے کہا کہ جب ہم کھیلتے تھے تو ہم ہمیشہ ایسے مواقع کا انتظار کرتے تھے، ستاروں سے ملتے تھے، ان سے بات چیت کرتے تھے اور ان سے ان کی مہارت اور فٹنس کے بارے میں پوچھتے تھے۔

ان کا کہنا تھا کہ یہ ابھرتے ہوئے کرکٹرز کے لیے بہترین کرکٹرز کے ساتھ کھیلنے، ان سے سیکھنے، ان سے مقابلہ کرنے اور یہ بھی دیکھنے کا موقع ہے کہ وہ کھیل میں کہاں کھڑے ہیں۔

پاکستان ویمن ٹیم کی سابق کپتان ثنا میرنے کہا کہ میں واقعی بہت پرجوش ہوں کیونکہ یہ پہلی بار ویمن لیگ کے نمائشی میچز ہو رہے ہیں۔ اس سے خواتین کرکٹرز کو آگے آنے اور اپنی صلاحیتیں دکھانے کا موقع ملے گا۔

انھوں نے کہا کہ یہ نمائشی میچز مقامی کھلاڑیوں کے لیے جدید دور کی کرکٹ کے تقاضوں کو جاننے اور سمجھنے کے لیے بہت اہم ہیں کہ بین الاقوامی کھلاڑی کیا کر رہے ہیں، وہ اپنی مہارت کو کس طرح بہتر بنا سکتے ہیں اور دباؤ کے حالات میں وہ کس طرح کارکردگی دکھا سکتے ہیں۔

ان کا مزید کہنا تھا کہ اپنے ملک میں ہونے والی لیگ نہ صرف کھلاڑیوں کو اپنے کھیل کو بہتر بنانے میں مدد دے گی بلکہ یہ انہیں غیر ملکی لیگز میں منتخب ہونے کا موقع بھی فراہم کرے گی۔

یہ بھی پڑھیں: پی ایس ایل ویمن نمائشی میچ کیلئے غیر ملکی کھلاڑیوں کا اعلان

عروج ممتازکا کہنا تھا کہ ایچ بی ایل پی ایس ایل 8 کے ساتھ ہونے والے یہ نمائشی میچز ایک بہت بڑی چیز ہے، یہ دیکھنے والوں کی تعداد میں اضافہ کرے گا اور نوجوان سامعین کو آگے آنے اور اس کھیل کو اپنانے کے لیے راغب کرے گا۔

انھوں نے پنڈی کے لوگوں سے درخواست کرتے ہوئے کہا کہ وہ آئیں اور خواتین کی کرکٹ کی حمایت کریں اور خواتین کی کرکٹ سے لطف اندوز ہوں۔

واضح رہے کہ نمائشی میچزمیں دو ٹیمیں مدِمقابل ہونگی۔

ایمازون: بسمہ معروف (کپتان)، عالیہ ریاض، انعم امین، عریشہ نور، ایمن فاطمہ، فاطمہ خان، فاطمہ ثناء، غلام فاطمہ، گل فیروزہ، کائنات امتیاز، لورا ڈیلانی (آئرلینڈ)، لارین ونفیلڈ ہل (انگلینڈ)، مایا باؤچر (انگلینڈ)، نشرح سندھو، صدف شمس، ٹمی بیومونٹ (انگلینڈ)، ٹیس فلنٹوف (آسٹریلیا) اور اُمِ ہانی۔

سپر ویمنز: ندا ڈار (کپتان)، ایمن انور، چماری اتھاپتھو (سری لنکا)، ڈینی ویاٹ (انگلینڈ)، ارم جاوید، جہاں آراء عالم (بنگلہ دیش)، لورا وولوارڈٹ (جنوبی افریقا)، لی تاہوہو (نیوزی لینڈ)، منیبہ علی، نتالیہ پرویز، عمائمہ سہیل، سعدیہ اقبال، شوال ذوالفقار، سدرہ امین، سدرہ نواز، سیدہ عروب شاہ، سیدہ معصومہ زہرا، طوبیٰ حسن۔

یاد رہے کہ ثنا میر،عروج ممتاز اور مرینہ اقبال پی ایس ایل 8 کے کمنٹری پینل کا حصہ ہیں۔